Inspirerande leikemiljø
I august 2023 kunne vi ønskje velkommen til eit leike – og opphaldsareal inne som har gjennomgått ei stor endring. Gamlebygget er pussa opp, og fire avdelingar har fått heilt ny utforming av leikemiljøet til barna. Viktige premiss for utforminga er at romma skal innby til t.d. leik, utforsking, fordjuping, sjølvstende og medverknad. Vi tilbyr i mykje større grad enn før det barn har behov for i sin viktigaste aktivitet leiken; nemleg møblar tilpassa barn, leikesoner, kryp-inn, små rom i rommet osv.

Leikeplassen og uteområdet - for barn i alle alderstrinn
Leikeplassen har leikeapparat av grovt tømmer og tau som er tilpassa ulike alderstrinn og utviklingsnivå. Alle barn får dermed utfordringar i tråd med eiga modning. Barna vert stimulert til fysisk aktivitet, utforsking og kreativ leik.

Dyra våre 
held til i dyrehuset ved grillhyttene. Her bor kaniner, marsvin og høner. Barna er dagleg med på stell av dyra, og får erfaring med og kunnskap om dyr. Avdelingane rullerar på å ha ansvar for dyra. Barn og foreldre stiller også opp som avløysarar i helg og ferie. Dette er svært populært.

Fjøra i Apalvika og Strømsvik
ligg i passe gangavstand frå barnehagen. Her grillar, badar og utforskar vi så ofte vi kan.

Gapahuken og elva
ligg i skogen i fin gangavstand frå barnehagen. Vi har ein flott gapahuk og utedo. Her ligg det tilrette for gode natur­opplevingar, som fiske, klatring, grilling, hinderløype, slynger og utforsking av skogen.

Trollskogen, Åsenråsa og Apalviksætra
Tre av våre fantastiske, og ofte nytta turmål. Her ligg det godt til rette for opplevingar og læring i spanande omgjevnadar. Trollskogen, Åsenråsa og Apalviksætra gir næring til fantasifull leik og kreativ utfalding.

Grillhyttene

Her foregår mykje dei same aktivitetane som inne i barnehagen. Hyttene er plassert ca. 50 m fra barnehagen i eit flott naturområde. Barnehagen tilbyr foreldre og tilsette å leige grillhyttene.