Vi meiner at kontakt med dyr er ein unik læringsarena for barna i alle aldersgrupper. Dyra våre er ikkje til matproduksjon (med unntak av egg frå hønene), eller slakting, men det handlar om ein innfallsvinkel til korleis utvikle sosial kompetanse, sjølvkjensle og sjølvbilete for einskildbarnet. I tillegg gjev kontakt med dyr ei kjensle av å meistre, kreativitet, spørje- og vitelyst.

Avdelingane har ansvar for dyra kva si veke. Ansvaret for dyra aukar i takt med alderen, og dei eldste ungane våre er med på mating, rydding og reingjering, hente spon og høy osv. Ei viktig oppgåve er også å følgje med på at dyra er friske og har det bra.

Dyrehaldet er for Plassebakken Barnehage ein arena for heilskapleg læring – for livet, av livet.

Vi erfarer at barn vert tiltrekt av dyr, og at barn gler seg over nærleiken og samspelet med dyra. Forsking hevdar at når eit menneske har fysisk kontakt med dyr, blir det utløyst positive endorfinar i kroppen som gjer at vi kjenner velvære.

Barn og foreldre stiller også opp som avløysarar i helg og ferie. Dette er svært populært.